اؤزوندن یئییب- ایچیب، باشقالارینا قوللوق ائدن فهله لر

نئچه گون اؤنجه آغیر بیر یاغیش یاغیب، بیزیم ائوی اوچورتدو. اوغلومو یوللادیم فهله مئیدانیندان بیر نئچه فهله گتیرسین ائوه باخدیرماغا. اؤزومده تک اوتوروب، چؤرگین قارینا یئتیشنده نئچه یه باشا گلدیگینی حئسابلیرام. چؤرگین اؤز پولو : 20 تومن، اونا یاوانلیق اولان پنیر : 600 تومن، چای: 200 تومن، و ... باشیزی چوخ آغریتمیرام هر چؤرک قارینا یئتیشنه دک 1680 تومن خرج گؤتورور.
ائله بو فیکیرلر و بو سالیب-چیخمالارلا مشغولودوم کی قاپینین آچیلماسی منی فیکیرلریمدن آییردی. اوغلوم سئوینرک دئدی:
- آتا! آتا! موشتولوغومو وئر.
- نه اولوب اوغول؟
- بیر فهله توتموشام هئیکل لی، قولو گوجلو. اؤزوندن یئییب، اؤزوندن ایچیب، بیزه ایشله یه جک.
آمما سیز عزیز اوخوجولار یانیلمیسیز. بوندان سونراسی سیز بیلدیگینیز کیمی اولمادی!!!
- اوغول من ایندی سالیب، چیخمیشام. چؤرگین دنه سی قارین ایچی تحویلی!!! 1680 تومن دیر. بو دورومدا کیم اؤزوندن یئییب- ایچیب، باشقالارینا قوللوق ائده بیلر؟
- آتا سیزین چاغیز کئچیب، سن آرتیق مؤوزه لرده یاشامالیسان. سن ایندی کی دورومو دوشونه بیلمیرسن. بیز هامی میز بو جور فهله لریک.
- اوغول بیر آچیقلا گؤروم هاردان دانیشیرسان.
- باخ آتا! بیزلر 12 آی گئجه-گوندوز قارینیمیزی دویورماغا چالیشیریق. آمما اؤز کولتوروموز یولوندا هئچ بیر ایش گؤرموروک. حتی داردا قالاندا اؤز دیلیمیزی و کولتوروموزو دانیریق. اوندان چوخ پیس اولان بو کی اوشاقلاریمیزلا اؤز اولو دیلیمیزده یوخ، بلکه فارسجا دانیشیریق. آتا بو دورومدا بیزلر اؤزوندن یئییب- ایچیب، باشقالارینا قوللوق ائدن فهله لر دئییلیک؟

نئچه جوره یاتماق وار؟

هر اینسانا 24 ساعات ایچینده ان آزی 8 ساعات یاتماق گرکدیر. بو یاتماق اونون بدنینی دینجلدیب، باشقا بیر گونده چالیشماق اوچون آماده ائدر. آمما یاتماق هامی اوچون ثابیت شکیلده اولماییب، چئشیدلی یاتیشلار وار:
1- دال اوسته : بو شکیلده یاتان اینسانلار عوموما خورافاتی اینسانلار اولارلار.
2- بؤر اوسته : ان چوخ ایستیفاده اولان یاتیش فورماسی.
3- اوزو قویلو : بو جور یاتماق، شئیطان یاتیشی دیر.
4- ایسکیمو یاتیشی : بو شکیلده یاتانلار ایلین 6 آیینی یاتیب، او بیری 6 آیی دا یاتماغا فیکیرلشرلر.
5- غفلت یاتیشی : بو فورمادا یاتان اینسانلار، غفلت یوخوسونا یاتیب، دؤوره لرینده کئچن و اولان اولایلاردان خبرسیز اولارلار. اونلار مصلحتی یاتماغدا گؤروب، اولایلار قارشی سیندا هئچ بیر عکس العمل گؤسترمزلر. حاقلارینی الیندن آلسان، اعتیراض ائتمه ییب، بلکه ده بو ایشی توجیه ائتمه یه چالیشارلار.
6- گؤرونمز یاتیش : بو یاتیش، ان پیس یاتیشدیر. بو یوخویا یاتانلار، ظاهیرده یاتماییب، باشقا بیر اینسانلار کیمی سحر یوخودان دوروب، چؤرک یئییب، ایشه گئدیب، آخشاملار ائوه گلرلر. ائله اونا گؤره ده بونلارین یوخودا اولماسی اؤزلرینه و بیر جوخ باشقالارینا بللی اولماز. و حتی بیر سیرا بو جور یاتانلار اؤزلرینی چوخ بؤیوک و شخصیتلی اینسانلار سانارلار. حئییف لر اولسون کی گاهدان دا ...
7- سیاسی یاتیش : بو یوخویا یاتانلار، سیاست اوزری یوخلامیشلار. سیاست چی لر بو کیمسه لری اؤز مصلحت لرینه گؤره، سئودیگی یوخولارا آپاریبلار. سونوجدا، بو جور یاتانلارین داورانیشی، سیاست چی لرین ایسته دیگی و فرمان وئردیگی کیمی اولاجاق. بونلارا قارانی، آغ دئسه لر، قبول ائده جکلر.
8- کولتورل یاتیش : بو طورلو یاتانلار، اؤز کولتورلرینی اؤیرنمه ییب، حتی اونو اسگیک گؤروب، اؤزگه کولتورلره قوللوقچو اولارلار.
9- اویوتولما : ...


سورو : سیزجه آذربایجان میللتی نه جور یاتیب؟