اؤزوندن یئییب- ایچیب، باشقالارینا قوللوق ائدن فهله لر

نئچه گون اؤنجه آغیر بیر یاغیش یاغیب، بیزیم ائوی اوچورتدو. اوغلومو یوللادیم فهله مئیدانیندان بیر نئچه فهله گتیرسین ائوه باخدیرماغا. اؤزومده تک اوتوروب، چؤرگین قارینا یئتیشنده نئچه یه باشا گلدیگینی حئسابلیرام. چؤرگین اؤز پولو : 20 تومن، اونا یاوانلیق اولان پنیر : 600 تومن، چای: 200 تومن، و ... باشیزی چوخ آغریتمیرام هر چؤرک قارینا یئتیشنه دک 1680 تومن خرج گؤتورور.
ائله بو فیکیرلر و بو سالیب-چیخمالارلا مشغولودوم کی قاپینین آچیلماسی منی فیکیرلریمدن آییردی. اوغلوم سئوینرک دئدی:
- آتا! آتا! موشتولوغومو وئر.
- نه اولوب اوغول؟
- بیر فهله توتموشام هئیکل لی، قولو گوجلو. اؤزوندن یئییب، اؤزوندن ایچیب، بیزه ایشله یه جک.
آمما سیز عزیز اوخوجولار یانیلمیسیز. بوندان سونراسی سیز بیلدیگینیز کیمی اولمادی!!!
- اوغول من ایندی سالیب، چیخمیشام. چؤرگین دنه سی قارین ایچی تحویلی!!! 1680 تومن دیر. بو دورومدا کیم اؤزوندن یئییب- ایچیب، باشقالارینا قوللوق ائده بیلر؟
- آتا سیزین چاغیز کئچیب، سن آرتیق مؤوزه لرده یاشامالیسان. سن ایندی کی دورومو دوشونه بیلمیرسن. بیز هامی میز بو جور فهله لریک.
- اوغول بیر آچیقلا گؤروم هاردان دانیشیرسان.
- باخ آتا! بیزلر 12 آی گئجه-گوندوز قارینیمیزی دویورماغا چالیشیریق. آمما اؤز کولتوروموز یولوندا هئچ بیر ایش گؤرموروک. حتی داردا قالاندا اؤز دیلیمیزی و کولتوروموزو دانیریق. اوندان چوخ پیس اولان بو کی اوشاقلاریمیزلا اؤز اولو دیلیمیزده یوخ، بلکه فارسجا دانیشیریق. آتا بو دورومدا بیزلر اؤزوندن یئییب- ایچیب، باشقالارینا قوللوق ائدن فهله لر دئییلیک؟